Durante e promer parti di e ruta e coredornan lo recore e parti di seronan caminda e resistencia fisico di e coredornan lo wordo getest te na su maximo. Den e parti aki e coredornan lo enfrenta subida y bahada hopi tecnico. Tambe nan lo wordo confronta cu e tecnica pa core den piedra los y santo blanco.
 
Den e di 2 fase di e ruta e aspecto y tecnica di core riba caminda smal jama "single trail" lo bin dilanti. Aki nan lo tin ruta nobo manera Seroe Cristal, Altovista y single trail di Boroncana, caminda cu e coredornan mester demostra nan condicion y hablidad den dominio di stuur pa maniobra den e camindanan hopi small aki.
 
E fase final ta e fase di endurance. Cuminsando for di Tiera del Sol, e coredornan mester demostra cu nan por core un ruta largo contra biento direccion pa Bushiribana. Akinan ta caminda e pianan lo ta hopi cansa y e reto tanto fisico como mental pa e coredornan ta pa duna lo mas cu nan por pa asina termina e careda. 
 
E recorido di diadomingo awor lo ta un distancia total di 48 km y lo wordo cori pa team consitiendo di 2 persona. Pa premiacion tur dos participante mester termina hunto. E start di e Duo Xtreme ta planea pa tuma lugar pa 7:30or di mainta dilanti di Ostrich farm na Bushiribana pa asina evita e solo fuerte di Aruba.
 
Pa e motibo aki tambe e inscripcion pa e careda aki lo tuma lugar diasabra atardi entre 6:00 y 7:30 or na WOK Away na St Cruz. Inscripcion lo ta Afl. 10 pa persona. Aki e coredornan lo haña nan number y instruccion.

E ruta di e recorido aki lo ta como lo siguiente:
- start Ostrich farm Bushiribana rumbo Ayo, bira na e caminda di santo na man drechi bai rumbo pa rooi prikichi
- sigi e caminda di asphalt direction pa Cero Corobori aki ta bira na man links direction pa Tamarijn
- jegando na e caminda di asphalt di tamarijn bira na bo man links sigi core rumbo pa Ceroe Pita sigi pasa e crusada grandi core bai rumbo rum shop bina.
- Promer cu jega akinan coi e caminda na bo man links bai ariba rumbo pa Siribana.
- Jegando na cursada di e caminda di Siribana bira na bo man rechts pa despues dibiaha bira na bo man links pa coi e caminda di Shaburi cu ta bai rumbo pa Cadushi Largo.
- E caminda ta un di asphalt cu dado momento ta bira terra
- bo ta pasa den un rooi cu ta hibo den un canal pa awa banda di e projecto di cas di Bareno.
- Despues di pasa den e kanal di awa bo ta sali riba crusada Cadushi Largo
- aki bo tin cu core direction di Cas Ariba pa coi e caminda di Recera y despues e caminda di tera na bo man links cu ta hibabo rumbo pa Maria Mai.
- Aki bo ta subi riba e caminda di asphalt cu ta hibabo rumbo Jamanota.
- Bira na bo man links y sigi core riba e caminda di asphalt cu ta hibabo rumbo pa San Fuego.
- Riba e caminda di San Fuego sigi core te ora bo jega un single trail na man rechts (CADENA) cu ta hibo patras di Cunuco Arikok y sigi direction di Shete.
- Akinan ta subi e caminda cortico di asfalt cu ta bay pa Natural Pool.
- Riba e caminda aki ta tuma un subida masha steil na man robes, subi esaki te na top pa despues coy un single trail cu ta bay direccion di Boca Daimari.
- Na Boca Daimari pasa den Santo Blanco pa subi sero direccion Andicuri. 
- Na Andicuri e recorido ta sigui pa Natural Brigde, Bushiribana, Budooi.
- Na e afgraving na Budui ta bira na man drechi sigui core bai patras di Seroe Cristal.
- Subi esaki pa despues baha bek patras di Seroe Crystal riba e single trail conoci como "Padje van Maurice".
- Na final di e caminda aki, sigui den direccion di Tanki y caminda principal di Jaburibari.
- Riba caminda principal di Jaburibari sigui direccion Calbas pa jega Kapel di Alto Vista.
- Na Kapel di Alto Vista sigui riba un single trail rumbo pa Boroncana.
- Sigui te ora jega Rancho Notorious pa subi un single trail cu ta guia bo te na e punta mas pariba di Tierra del Sol.
- Akinan subi e caminda di tera cu ta hiba bo bek te Bushiribana y final na Ostrich farm.
 
Bini uno, bini tur, nos ta wardabo.