Josmary Geerman a gana oro y plata na Caribbean Cycling Youth Championships  

ORANJESTAD - Fin di siman ultimo, 12 y 13 di juli 2008, Josmary Geerman, representando Aruba den categoria di dama 15 pa 18 aña, ta logra oro den time trial y plata den e careda di distancia largo di Caribbean Cycling Youth Championships 2008 na Curacao. Cu e dos medayanan di Josmary Geerman, representando tur dama di Aruba, a duna un presentacion tremendo.  

Resultado di CCYC 2008 di Josmary:

Den time trial, coriendo 20 kilometer contra holoshi, den e categoria di dama 15 – 18 aña, Josmary Geerman (Aruba) ta termina cu tempo di 0:27:30. Trinta seconde dilante di Nuhely Emerencia (Curacao) cu tempo di 0:28:00, sigui pa Hayley Evans (Bermuda) cu tempo di 0:29:11.

      Den e careda di distancia largo, coriendo 42.5 kilometer, Nuhely Emerencia (Curacao) a termina na prome luga cu tempo di 1:29:03, sigui na di dos lugar pa Josmary Geerman (Aruba) cu tempo di 1:30:42. Na di tres luga a keda Sophie Adams (Bermuda) cu tempo di 1:30:44. Den e careda di distancia largo, Josmary a demonstra un determinación fuerte. El a haya un flat, pero a bin bek den e careda cu hopi forza, pasando competido di Bermudo djis prome e finísh line.

      Den reparticion di medaya pa pais, Curacao a logra un total di 6 medaya cual 2 tabata oro, 3 di plata y 1 di brons. Barbados a haya un total di 4 medaya, cual 2 tabata oro, 1 di plata y 1 di brons. Josmary a gana Aruba su unico medayanan, un di oro y un di plata.

AWB ta felicita e ekipo hubenil:

       Aruba Wieler Bond (AWB) ta felicita Josmary Geerman y tur e hoben coredonan cu nan prestacion na nos hermana isla Curacao den e maximo careda regional den categoria hubenil.

      Ciclismo ta ofrece varios forma pa ehercisio y deporte riba bais, tin mountain bike, caredanan di ruta of road race, como tambe BMX. Di e forma aki tur persona, inrespecto di edad, sexo of condicion fisico ta haya amplio oportunidad pa participa na eventonan deportivo organisa pa AWB.