Relato di Campeonato Panamericano PDF Print E-mail
Top ciclistanan Arubiano ta haya experiencia internacional den Campeonato Pan Americano na Uruguay 
 
Recientemente, e dos astronan di ciclismo Aruba, George Winterdal y Gino Hodge, a representa nos isla entre 25 pais y mas di 250 participante, den e Campeonato Panamericano di ciclismo. Nan a competi den un time trial di 40 kilometer y un circuito di 168 kilometer riba road bike. E maximo campeonato pa e region pan americano a tuma luga na Montevideo, Uruguay, unda nos atletanan tabata tin un bon prestacion y a haya mas experiencia internacional.

Digno representacion:

George Winterdal y Gino Hodge a clasifica durante e campeonato local pa nan prestacionnan consistente y sobresaliente. Durante henter aña a logra conkista varios careda cu bon puntuahe, tanto den careda di velocidad, distancia y resistencia. Entrenamento constante y un condicion indiscutibel ta un caracteristica di ambos atleta.  E delegacion di Aruba pa e careda y congreso anual di COPACI, a consisti di 2 di nos top ciclistanan, esta George Winterdal y Gino Hodge, acompaña pa Gert van Vliet, como coach y Juelle Thode como representante di Aruba Wieler Bond. For di e momento di yegada, nos atletanan a bai di biaha pa nan training riba e ruta di careda, e tan famoso “La Rambla”. E ruta riba su mes ta uno hopi pintoresco ya cu e ta core a lo largo di e costa di Uruguay. Algun subida falso y biento fuerte, cu por bini di cualkier direcion, a haci e ruta aki uno bastante desafiante, apesar di e liña plat di e caminda.    

 

RESULTADO PA ARUBA:  Pa Aruba su atletanan, e competencia a cuminsa diaberna dia 9 di mei, cu un Time Trial di 40 km na cual Gino Hodge a participa. Apesar di algun circumstancia tecnico, e la logra termina e careda den 1 ora y 38 seconde, esaki tawata solamente 9 seconde tras di e competidor di St. Lucia, cual tawata e unico otro isla cu a participa den e Time Trial.

 

 

 


 Diadomingo dia 11 di mei, e careda di ruta a tuma luga riba e mesun pista. Atrobe un careda desafiante, caminda atakenan formal tawata cai di parti di e paisnan grandi. A start un total di 81 coredo y 59 a termina e careda completo di 168 km. Den e esakinan tawata tin nos atleta George Winterdal, cu a termina e careda aki den 4 ora 3 minut y 23 seconde, solamente 6 minuut y 40 seconde tras di e peloton principal.      

COBERTURA PA ARUBA:  Nos atletanan a percura pa Aruba ricibi amplio cobertura cerca comentaristanan, cual transmision a wordo transmiti en vivo na television Uruguayo. Aruba su atletanan a competi contra paisnan grandi, manera Canada, Brazil, Aregentina y varios otro paisnan di Latino y Centro America. E federacion di ciclismo di Uruguay mes a keda hopi satisfecho cu Aruba su presencia y participacion na e campeonato panamericano. 

 

Na e congreso di COPACI (Confederacion Panamericano di Ciclismo) cu a tuma lugar diasabra 10 di mei, a wordo anuncia e localidad y detayesnan pa e Campeonato Panamericano di Ciclismo pa 2009 cu lo tuma lugar na Chihuahua, Mexico. Durante e congreso e delegacion di Aruba a haña e oportunidad pa cera conoci cu e presidente di COPACI, e federacion di ciclismo continental na cual Aruba ta pertenece, y tambe e presidente di UCI, Sr. Pat MacQuaid. E congreso a pone e delegacion di Aruba na altura di varios programa y desaroyo cu ta andando den e mundo di ciclismo cu ta di gran importancia pa Aruba. Mas di esaki proximamente Ciclismo na Aruba ta creciendo y nos nivel ta subiendo.

Participacion na competencia internacional di nivel ta importante pa e desaroyo di nos protagonistanan local. Directiva di Aruba Wieler Bond lo sigui traha pa e deporte di ciclismo na Aruba cu e meta pa haci Aruba un competidor fuerte den caredanan internacional tambe.

AWB ta organisa tur careda di ciclismo na Aruba bou auspicio di Union Internacional di Ciclismo (UCI). AWB ta felicita ambos coredo cu nan logro.

  
 
< Prev   Next >
[ Back ]